Ի՞նչ է կատարվում «Կիլիկիա» առևտրի կենտրոնի շուրջ. Անհատ ձեռներեցները շարունակում են բողոքել
«Կիլիկիա» առևտրի կենտրոնը շարունակում է փակ մնալ, իսկ այնտեղ տաղավարներ վարձակալած մարդիկ` բարձրաձայնել իրենց խնդրի ու ամեն օր կրած վնասների մասին:
Էկոնոմիկայի նախարարության Լիցենզավորման գործակալության պետ Արմեն Նալբանդյանը Panorama.am-ին հայտնեց, որ «ԼԱՆ» ՍՊԸ-ին տրվել են առևտրի իրականացման վայրի կազմակերպման գործունեության լիցենզիաներ: Գործակալության պետը պաշտոնական գրություններ է ուղարկել Պետական եկամուտների կոմիտեին ու դատական դեպարտամենտին` ստանալու «ԼԱՆ» ՍՊԸ գործունեության կասեցման որոշման հիմքերը և տեղեկություններ, հաստատվել է, արդյոք ընկերության կողմից ներկայացված ֆինանսական առողջացման ծրագիրը:
«Եթե որևէ տվյալներ ունեն, մեզ էլ տրամադրեն, որպեսզի իմանանք մեր հետագա գործունեությունն ինչ է լինելու»,-ասաց Նալբանդյանը:
Նրա խոսքով, օրենքով չի արգելվում սնանկ ճանաչված ընկերությանը լիցենզիա տրամադրել, իրենք տրամադրել են, սակայն ընկերությունը պետք է բավարարեր նաև մեկ այլ պայման` ունենար դատարանի կողմից հաստատված առողջացման ծրագիր:
Առողջացման ծրագիրը Կենտրոն և Նորք Մարաշ վարչական շրջանների ընդհանուր իրավասության դատարանը մերժել է, ընկերությունն այն բողոքարկել է վերաքննիչ դատարանում:
«ԼԱՆ» ՍՊԸ-ին պատկանող առևտրի կենտրոնում տնտեսական գործունեություն իրականացնող անհատ ձեռներեցների կողմից Վճռաբեկ դատարանի նախագահ Արման Մկրտումյանին նամակ են հղել, որտեղ տեղեկացնում են իրենց խնդրի մասին ու պահանջում արդարացի լուծում:
«Թվով 118 անհատ ձեռներեցներս նախկինում առևտուր ենք իրականացրել «Հրազդանե տոնավաճառում: 2013թ. սկզբին տեղեկացել ենք, որ «Հրազդանե տոնավաճառի տարածքում քաղաքաշինական ծրագիր է իրականացվելու, իսկ հարևանությամբ գտնվող ք. Երևան, Ծիծեռնակաբերդի խճուղի 1/3 հասցեի թիվ 79 և 80 շինություններում արդիական պայմաններով կազմակերպված, «ԼԱՆ» ՍՊԸ-ին պատկանող տոնավաճառի տարածք է առկա: Միևնույն ժամանակ տեղեկացել ենք, որ «ԼԱՆ» ՍՊԸ-ն գտնվում է սնանկության գործընթացում, բայց առողջացման ծրագրի ուղղությամբ քայլեր են ձեռնարկվում: Մենք դիմեցինք ընկերության սեփականատիրոջն ու սնանկության գործով կառավարչին և առողջացման ծրագրի շրջանակներում համատեղ փոխշահավետ համաձայնության եկանք: Արդյունքում տեղափոխվեցինք այդ տարածք: Սնանկության գործով կառավարիչը դիմել և «Լան» ՍՊԸ-ի անվամբ 18.05.2013թ-ին ստացել է լիցենզիա (թիվ 000119 և թիվ 000120), այնուհետև այդ լիցենզիաների հիման վրա պայմանագրեր (թիվ ԵԿԴ/0079/04/09 սնանկության գործով 20.05.2013թ. թվագրված որոշման դեմ բերված բողոքին կից ներկայացված են) ենք կնքել «ԼԱՆ» ՍՊԸ-ի հետ, դիմել հարկային մարմնին, ստացել ՀԴՄ-ներ ու տեղափոխվել նշված տարածք, որտեղ առևտրային գործունեություն իրականացնելու համար ստեղծված են բոլոր բարեկիրթ և բարենպաստ պայմաններ»:
Ըստ նամակի, սակայն Երևանի Կենտրոնի դատարանի նախագահի ինչ-որ գրության հիման վրա ՊԵԿ քննչական վարչությունում նյութեր են նախապատրաստել և 01.06.2013թ. նշված վարչության ողջ անձնակազմն ու օպերատիվ վարչության աշխատակիցները զննության պատրվակով մտել են տոնավաճառի տարածք և սկսել են կնքել տաղավարները:
«Փաստացի մեր ունեցվածքը արգելանքի տակ հայտնվեց, մեզ արգելվեց առևտուր իրականացնել: Այդ կերպ վնաս է հասցվել նաև պետական բյուջեին՝ գործունեություն չիրականացնելու պայմաններում հարկեր չվճարելու պատճառով»,-Վճռաբեկ դատարանի նախագահին ուղղված նամակում նշում են նրանք:
Նամակում նշված է, որ «ԼԱՆ» ՍՊԸ-ի սնանկության գործով Կենտրոնի դատարանը 20.05.2013թ. թվագրված որոշում է կայացրել, որով արգելվում է տոնավաճառի գործունեությունը, բայց այդ որոշումը 30.05.2013թ. բողոքարկվել է և գործը գտնվում է վերաքննիչ դատարանում, սակայն բողոքը քննության չի առնվում:
«Վերը նշվածից ակնհայտ է, որ այդ բողոքի քննության հարցում մենք շահագրգիռ անձինք ենք հանդիսանում և բողոքի քննության ուշացման յուրաքանչյուր օրն անգամ մեզ համար էական է` մենք պարտավորություններ ունենք բանկերի, մատակարարների և պետբյուջեի նկատմամբ, որոնց չկատարման դեպքում տվյալ պարտավորություններին ավելանում են տույժ-տուգանքները: Մենք պահանջում ենք, որպեսզի թողեն մենք մեր երկրում աշխատենք, հակառակ դեպքում, թող մեզ համար տոմս առնեն, մենք թողնենք անվերադարձ գնանք: Մենք այժմ գնալու հնարավորություն էլ չունենք»,-գրում են նրանք:
Վճռաբեկ դատարանի` Արցախում գտնվող նախագահն առայժմ նամակին չի արձագանքել:
ՊԵԿ մամուլի ծառայությունից Panorama.am-ին հայտնեցին, որ ՊԵԿ քննչական վարչությունում նյութերը սկսել են նախապատրաստել ՊԵԿ Օպերատիվ հետախուզության վարչությունից ստացված հաղորդման հիման վրա:
Տրամադրած տվյալների համաձայն, 2010-ի փետրվարի 22-ին սնանկ ճանաչված «Լան» ՍՊ ընկերության սնանկության գործերով կառավարիչ Խաչիկ Նազարյանն առողջացման ծրագրի շրջանակներում 2013թ. մայիսի 18-ին ՀՀ Էկոնոմիկայի նախարարությունից ստացել է առևտրի իրականացման վայրի կազմակերպման գործունեության թիվ 000119 և 000120 լիցենզիաները և այն օգտագործման է հանձնել «Մադէլինա-Լենա» ՍՊ ընկերությանը, որն էլ իր հերթին թվով 118 տնտեսվարող սուբյեկտների հետ կնքել է առևտրի իրականացման վայրում մատուցման մասին պայմանագրեր և վարձակալության հանձնել «Լան» ՍՊ ընկերությանը պատկանող տաղավարները:
Լիցենզավորման գործակալության պետ Ա. Նալբանդյանը «ԼԱՆ» ընկերության կողմից` լիցենզիան մեկ այլ ընկերությանը պայմանագրային հիմունքներով հանձնելու վերաբերյալ ստույգ տեղեկություններ չունի: Ասում է, եթե նման բան է տեղի ունեցել, ապա դա «Լիցենզավորման մասին» օրենքի խախտում է:
ՊԵԿ մամուլի ծառայությունից տեղեկացրեցին, որ 2013թ. մայիսի 20-ին «Լան» ՍՊ ընկերության սնանկության գործով կառավարիչ Խ. Նազարյանը միջնորդություն է ներկայացրել դատարան` ընկերության գործունեությունը մեկ տարի ժամանակով վերսկսելու մասին:
Ըստ ՊԵԿ տրամադրած տեղեկատվության, առանց դատարանի համապատասխան որոշման կառավարիչ Խ. Նազարյանի կողմից կատարվել է գործունեության վերսկսման գործնական նախապատրաստական աշխատանքներ, մասնավորապես` ՀՀ էկոնոմիկայի նախարարությունից ստացել է առևտրի իրականացման վայրի կազմակերպման գործունեության լիցենզիաները և այն օգտագործման է հանձնել «Մադէլինա-Լենա» ՍՊ ընկերությանը, որն էլ իր հերթին Երևան քաղաքի Կենտրոն և Նորք Մարաշ վարչական շրջանների ընդհանուր իրավասության դատարանի կողմից «Լան» ՍՊ ընկերության գործունեությունը վերսկսելու թույլտվությունը ստանալու դեպքում` իրավասու կլիներ վերսկսման ծրագրի շրջանակներում իրականացնել համապատասխան առևտրային գործունեություն:
«2013թ. մայիսի 20-ին Երևան քաղաքի Կենտրոն և Նորք Մարաշ վարչական շրջանների ընդհանուր իրավասության դատարանի որոշմամբ մերժվել է կառավարիչ Խ. Նազարյանի միջնորդությունը` «Լան» ՍՊ ընկերության գործունեությունը մեկ տարի ժամանակով վերսկսելու մասին: Ներկայումս «Լան» ՍՊ ընկերության գործունեությունը կասեցված է, հետևաբար 2013թ. մարտի 20-ին կնքված պայմանագիրը չի հանգեցնում որևէ իրավաբանական հետևանքների»,-նշում են ՊԵԿ-ից:
Պետական եկամուտների կոմիտեի տրամադրած պարզաբանման մեջ նաև նշվում է, որ «Լան» ՍՊ ընկերությանը պատկանող անշարժ գույքի կառավարելու, օգտագործելու և տնօրինելու իրավունքը` «Լան», «Մադէլինա-Լենա» ՍՊ ընկերությունների, ինչպես նաև այլ անձանց կողմից իրականացնելը չեն բխում ՀՀ-ում գործող օրենքների պահանջներից:
«Այսինքն` «Մադէլինա-Լենա» ՍՊ ընկերությունը, չունենալով առևտրի իրականացման վայրի կազմակերպման գործունեության լիցենզիա, 2013թ. մայիսի 19-ից զբաղվել է լիցենզավորման ենթակա ձեռնարկատիրական գործունեությամբ, ինչն իր մեջ պարունակում է ՀՀ քրեական օրենսգրքի 188-րդ հոդվածի հատկանիշներ:
«Մադէլինա-Լենա» ՍՊ ընկերության կողմից առանց համապատասխան լիցենզիայի առևտրի իրականացման վայրի կազմակերպման գործունեության արդյունքում պետությանը պատճառված վնասի չափը պարզելու համար 2013թ. հունիսի 3-ին հանձնարարվել է ՀՀ ԿԱ ՊԵԿ ՕՀ վարչության աշխատակիցներին կատարել պետությանը պատճառված վնասի հաշվարկ:
2013թ. հունիսի 4-ին ՀՀ ԿԱ ՊԵԿ ՕՀ վարչությունից ստացվել է «Մադէլինա-Լենա» ՍՊԸ-ի կողմից առանց համապատասխան լիցենզիայի առևտրի իրականացման վայրի կազմակերպման գործունեության վերաբերյալ նախնական հաշվարկը, համաձայն որի ընկերությունից ենթակա է պետական բյուջե գանձման առևտրի իրականացման վայրի կազմակերպման գործունեության լիցենզիայի համար գանձվող պետական տուրքի` 1.000.000 դրամի տասնապատիկի չափով: Երկու հասցեի համար այն կկազմի 20.000.000 դրամ, ինչպես նաև խախտումներ կատարած անձից գանձվում է նաև լիցենզավորման համար օրենքով սահմանված պետական տուրքի գումարի չափով վնասի հատուցում, այն է` 2.000.000 դրամ, որն էլ համարվում է պետությանը հասցված վնաս:
«Մադէլինա-Լենա» ՍՊԸ-ի կողմից առանց համապատասխան լիցենզիայի առևտրի իրականացման վայրի կազմակերպման գործունեություն իրականացնելու և դրա արդյունքում պետությանը խոշոր չափի` 2.000.000 դրամի վնաս պատճառելու դեպքի առթիվ 2013թ. հունիսի 4-ին հարուցվել է հ.83106813 քրեական գործը, և կատարվում է նախաքննություն»,-հայտնում են ՊԵԿ-ից:
Իսկ ձեռներեցները այս ամենի մեջ մեղադրում են դատավոր Ռուբեն Վարդազարյանին:
«Դրանց նմանների պատճառով է, որ հիմա հայերը Հայաստանից, ոչ թե արտագաղթում են, այլ գաղթում են: Դրանց նմանների պատճառով է, որ երկրումս մարդ չի մնում, էս տեմպերով որ մի քանի տարի հետո էս նույն սրահը ինձ ձրի էլ տան, մեկ է չեմ աշխատի, որովհետև առևտուր անող էլ չի մնա: Դա՞ է դրանց ուզածը: Մի հոգու պատճառով ինչի՞ համար հիմա 350 հոգի պիտի թքի ամեն ինչի վրա ու գնա, ինչի՞ համար: Ես 3 երեխա ունեմ, հետո էլ ասում են երեխաներ ունեցեք: Ունենանք, որ սենց պահենք: Իմ երեխաները սոված են քնում, իսկ Ռուբեն Վարդազարյանը երևի սնունդը աղբամաննա լցնում»,-դժգոհում են ձեռներեցները:
Նշենք, որ այս պահին խմբագրությանը հայտնի չէ «ԼԱՆ» ընկերության կողմից ներկայացված առողջացման ծրագրի` դատարանի կողմից մերժելու հիմքը:
Շարունակելի…
Լրահոս
Տեսանյութեր
Եթե Ադրբեջանը վստահ է, ինչո՞ւ է դատական գործընթացները դադարեցնելու մասին գաղափար առաջ քաշում
